Монгол-Германы хамтарсан хөрөнгө оруулалттай ерөнхий боловсролын Дархан Эмпати сургууль нь Монголын боловсролын хөгжил дэвшилд хувь нэмрээ оруулах, бүрэн дунд боловсролын стандартыг бүрэн эзэмшүүлэх, дэлхийн аль ч орны их дээд сургуульд элсэх шаардлагыг хангасан, үндэснийхээ уламжлалт үнэт зүйлсийг дээдэлсэн, зөв бодол төлөвшилтэй, бие даасан залуусыг бэлтгэхэд эрхэм зорилготойгоор 29 дэх жилдээ үйл ажиллагаагаа явуулж байна. Тус сургууль стандартын шаардлага хангасан тохилог орчин, сүүлийн үеийн тоног төхөөрөмж , техник хэрэгслэлээр бүрэн хангагдсан 1 ээлжинд 620 хүүхэд суралцах хичээлийн байр, 250 хүүхдийн дотуур байр, хоолны газар, номын сан, биеийн тамирын заал, хөл бөмбөгийн талбайтай ногоон орчин бүхий цогцолбор сургууль болж өргөжин тэлж байна. Тус сургууль нь 2015 оноос Дархан Эмпати сургууль нэртэйгээр, Боловсрол, соёл, шинжлэх ухаан, спортын сайдын 2019 оны 08 дугаар сарын 15-ны өдрийн А/511 тушаалын дагуу Кембрижийн сургалтын хөтөлбөрийг хэрэгжүүлж олон улсын шалгалтад сурагчдаа бэлтгэхээс гадна Үндэсний цөм хөтөлбөрийн 6-15 судлагдахууны хичээлийг бүрэн хэрэгжүүлж байна. Боловсрол, шинжлэх ухааны сайдын 2022 оны 12 сарын 27-ны өдрийн А/569 тушаалын дагуу Бага боловсрол эзэмшүүлэх сургалтын үйл ажиллагаагаа 2023 оны 09 сарын 01-ний өдрөөс эхлэн хэрэгжүүлж байна.